संसद् बैठक एक सातालाई स्थगित, एमालेको नाराबाजीबीच विनियोजन विधेयक बहुमतले स्वीकृत

काठमाडौं , भदौ २९ । प्रतिनिधिसभा बैठकले प्रमुख प्रतिपक्षी दल नेकपा (एमाले)को विरोधबीच बजेट स्वीकृत भएको छ ।

आजको बैठकमा अर्थमन्त्री जनार्दन शर्माले विनियोजन विधेयक–२०७८ लाई स्वीकृत गरियोस् भन्ने प्रस्ताव पेस गरेका थिए ।

उक्त प्रस्तावमाथि सैद्धान्तिक छलफल भएपछि सभामुख अग्निप्रसाद सापकोटाले विधियोजन विधेयक–२०७८ लाई निणायार्थ पेस गरेका थिए । सभामुख सापोटाले निर्णयार्थ पेस गरेको विधेयक प्रमुख प्रतिपक्षी एमाले सांसदको नाराबाजीबीच बहुमतले स्वीकृत भएको छ ।

यसैबीच प्रमुख प्रतिपक्षी दल नेकपा (एमाले)ले आज  पनि प्रतिनिधिसभाको बैठक अवरुद्ध गरेको छ। सभामुखले बैठक सुरु भएको जनाउ दिनेबित्तिकै एमालेका सांसदहरुले बेल घेरेर नाराबाजी सुरु गरेका थिए ।

एमालेले संसद् अवरोध गरेको आज चौथो दिन हो। प्रतिनिधिसभाको नवौं अधिवेशन सुरु भएपछि प्रमुख प्रतिपक्षी दल नेकपा एमालेले लगातार संसद् अवरोध गरिरहेको छ। गत बिहीबार, शुक्रबार र आइतबारको प्रतिनिधिसभा बैठक पनि एमालेले अवरुद्ध गरेको थियो। शुक्रबारको बैठक भने नाराबाजीकै बीच सभामुखले सञ्चालन गरेका थिए।

सभामुख अग्नि सापकोटाले माफी माग्नुपर्ने र एमालेले निष्काशनको कारबाही गरेका माधव नेपालसहितका १४ सांसदलाई पदमुक्त गर्नुपर्ने माग एमालेको छ।

नेकपा एमालेको अवरोधका बीच प्रतिनिधिसभाको बैठक सञ्चालन गरेका सभामुख अग्निप्रसाद सापकोटाले एक सातालाई बैठक स्थगित गरेका छन्।