लकडाउनको ७१ दिन: पसल खोल्न पाउनुपर्ने माग गर्दै व्यवसायी प्रदर्शनमा

काठमाडौं ।कोरोना भाइरस नियन्त्रणका लागि सरकारले नेपालमा लकडाउनको घोषणा गरेको ७१ दिन भइसकेको छ । र, यो अवधिसम्म आइपुग्दा लकडाउनले जिउन समेत मुस्किल हुन थालेको भन्दै खुकुलो पार्न जनस्तरबाट माग हुँदै आएको छ ।

कारोनाका कारण सरकारले जारी गरेको लकडाउनको आज ७१ दिन पुगेको छ । जारी लकडाउनका कारण व्यापार व्यवसायी तथा अन्य उपभोग्य बस्तुको चौपट भएको छ । लकडाउनका कारण ब्यापारीहरुले भनेको समयमा पसल खोल्न पाएका छैनन् भने ताकीएको समयमा मात्रै खोल्ने गरेका छन् । यसरी लगाएको लकडाउनले आफुहरुको व्यापार नै ठप्प रहेको भन्दै कतिपय व्यवसायी रुष्ट समेत भएका छन् । यता व्यपार चौपट भएको भन्दै जोरपाटीका व्यवसायीले मंगलबार प्रदर्शन गरेका छन् ।

पसल खोल्न पाउनु पर्ने माग गर्दै प्रदर्शनमा उत्रिएका व्यवसायीलाई प्रहरीले लखेटेको थियो । त्यसक्रममा पसल बन्द गर्न अटेर गर्ने एक जनालाई केहीबेर नियन्त्रणमा लिइएको महानगरीय प्रहरी वृत्त, बौद्धका डीएसपी नवीन कार्कीले जानकारी दिए ।

कार्कीले भने, ‘लकडाउन उल्लंघन गरेकाले नियन्त्रणमा लिएका थियौं, अहिले छाडिसकेका छौं ।’ गोकर्णेश्वर नगरपालिकाका मेयर सन्तोष चालिसेलगायतसँग छलफल गर्ने सहमति भएपछि व्यवसायीहरुले प्रदर्शन रोकेका थिए । छलफलका क्रममा नगरपालिकाले पसल खोल्ने वातावरणका लागि पहल गर्ने आश्वसन दिएको छ ।

नगरका प्रशासकीय अधिकृत नरहरि घिमिरे भने यो विषयमा निर्णय गर्ने अधिकार नगरपालिकासँग नभएको बताए । ‘हामीले पनि यसमा केही गर्न सक्ने अवस्था छैन, केन्द्रबाटै नयाँ निर्णयको पर्खाइमा छौं’, उनले भने ।

अहिले नगरपालिकाका अधिकारीहरुले प्रदर्शनरत पक्षलाई सरकारले छिट्टै नयाँ निर्णय ल्याउने बताएर थुम्थुम्याउने प्रयास गरेका छन् । उपत्यकाका विभिन्न क्षेत्रका व्यवसायीले मात्रै होइन अन्यले पनि पसल खोल्न पाउनुपर्ने माग गर्दै प्रशासन गुहार्न थालेका छन् । उनीहरुले नजिकैको प्रहरी कार्यालयमा गएर लिखित निवेदन पनि बुझाएका छन् ।लकडाउन बढ्दै जाँदा सर्वसाधारणबाट गुनासो आउने क्रम पनि बढिरहेको छ ।

सरकारले भने लकडाउनलाई ३२ जेठसम्म बढाउने निर्णय गरिसकेको छ । यद्यपि, सरकारले निर्णयलाई थप व्याख्या गरेर केही स्थानमा लकडाउन खुकुलो बनाउन सकिने बारे छलफल गरिरहेको छ ।