ओलीको असंवैधानिक कदमलाई देउवाले साथ दिए ,यसले पनि ओली झन् अधिनायकवादी बन्न थाले : पौडेल

काठमाडौं, फागुन ९ । नेपाली कांग्रेसका वरिष्ठ नेता रामचन्द्र पौडेलले प्रधानमन्त्री केपी शर्मा ओलीको असंवैधानिक र अलोकतान्त्रिक कदमलाई कांग्रेस सभापति शेरबहादुर देउवाले साथ दिएको बताएका छन्।

आइतबार प्रेस युनियन सुनसरीले इटहरीमा आयोजना गरेको पत्रकार भेटघाट कार्यक्रममा वरिष्ठ नेता पौडेलले यस्तो बताएका हुन् ।

देउवाको साथ र समर्थनका कारण ओली थप अधिनायकवादतर्फ उन्मुख भएको उनले बताए । उनले ओलीलाई देउवाको समर्थनपछि संविधान, लोकतन्त्र र गणतन्त्र धरापमा परेको बताए।

‘देउवाको साथ र समर्थन पाएपछि ओली झन् अधिनायकवादी बन्न थाले’, पौडेलले भने, ‘संविधान, लोकतन्त्र, गणतन्त्र र संघीयता धरापमा पर्ने खतरा बढ्यो।’

उनले सरकारले गरेका भ्रष्टाचार, गैरसंवैधानिक नियुक्तिमा पनि देउवाले ओलीलाई साथ दिएको आरोप लगाए।नेता पौडेलले कांग्रेसको आधिकारिक निर्णय भनेको प्रतिनिधि सभा विघटन असंवैधानिक भन्ने रहेको बताउँदै कार्यकर्तालाई आन्दोलनमा लाग्न आग्रह गरे। उनले संविधान रक्षाको जिम्मा कांग्रेसको काँधमा आएको बताउँदै प्रतिनिधि सभा विघटनका विपक्षमा उभिन समेत आग्रह गरे।

नेता पौडेलले केही दिनअघि पोखरामा सभापति देउवाको आन्दोलन गर्नका लागि पैसा नभएको भन्ने भनाइप्रति पनि आपत्ती जनाए। उनले पैसाले आन्दोलन नहुने बताउँदै लोकतन्त्र र संविधानका बचाउनका लागि आन्दोलनको विकल्प नभएको बताए।

‘आन्दोलन पैसाले गर्ने होइन’, उनले भने, ‘विचार र सिद्धान्तले आन्दोलन अगाडि बढाइ लोकतन्त्र र संविधान बचाउनु कांग्रेसको दायित्व हो।’

उनले कांग्रेसले अदालतको फैसलालाई मान्ने बताए पनि अदालतको फैसला कुरेर अहिले मौन बस्न नमिल्ने बताए। यता साभापति शेरबहादुर देउवाले भने अहिले संसद विघटनको मुद्दाको बसह जारी रहेकाले आन्दोलनमा गएर यहि गर भन्न नमिल्ने बताउँदै आएका छन् ।

उनले यस्तो बताइरहदा आफ्ना कार्यकर्तालाई चुनावमा जुट्न पनि आग्रह गरेका छन् । साथै नेकपाको ओली समुह र दाहाल नेपाल समुहको खुलेर विरोद्ध गर्न पनि निर्देशन दिएका छन् ।