सुरक्षा परिषद बैठक: मुलुकको पछिल्लो सुरक्षा अवस्थाबारे छलफल

काठमाडौं, फागुन ११ । सुरक्षा परिषदको बैठकमा मुलुकको पछिल्लो सुरक्षा चुनौतीका विषयमा छलफल भएको छ। मंगलबार विहान प्रधानमन्त्री निवास बालवाटारमा बसेको परिषदको बैठकमा मुलुकको पछिल्लो सुरक्षा अवस्थाका विषयमा छलफल भएको हो।

नियमित बैठकको संज्ञा दिइएपनि प्रतिनिधिसभा विघटन विरुद्ध परेको रिट उपरको वहस सकिएको र केही दिनभित्रै सर्वोच्चले फैसला सुनाउने तयारी गरिरहँदा त्यसबाट उत्पन्न हुने परिस्थितिका विषयमा पनि बैठकमा छलफल भएको स्रोतले जनाएको छ।

बैठकमा प्रधानमन्त्री केपी शर्मा ओलीले मुलुकको पछिल्लो अवस्थाका विषयमा भनाइ राखेका थिए। साथै बैठकमा प्रधानमन्त्री केपी शर्मा ओलीले निर्वाचनलाई लक्षित गर्दै सुरक्षा व्यवस्था मजबुत बनाउन निर्देशन दिएका छन् ।

पुस पाँच गते प्रतिनिधिसभा विघटन भएसँगै त्यस उपर परेका रिटमाथि संवैधानिक इजलासमा सुनुवाई सकिएको छ। सर्वोच्चले केही दिनभित्रै प्रतिनिधिसभा विघटन विरुद्ध परेको रिटमाथिको फैशला सुनाउँदै छ।

सर्वोच्चले प्रतिनिधिसभा पुनःस्थापना गरेपनि वा प्रधानमन्त्रीको कदमलाई सदर गरेपनि त्यसपछि उत्पन्न हुने परिस्थितिका विषयमा बैठकमा छलफल भएको स्रोतले जनाएको छ ।

समग्र राष्ट्रिय हित, सुरक्षा र प्रतिरक्षा सम्बन्धी नीति तर्जुमा गर्न तथा नेपाली सेना परिचालन वा नियन्त्रणका लागि सरकारलाई सिफारिस गर्न प्रधानमन्त्रीको अध्यक्षतामा राष्ट्रिय सुरक्षा परिषद् रहने संवैधानिक प्रावधान छ।

बैठकमा परराष्ट्रमन्त्री प्रदीप ज्ञवाली, अर्थमन्त्री विष्णु पौडेल, गृहमन्त्री रामबहादुर थापा र प्रधानसेनापति पूर्णचन्द्र थापा सहभागी थिए। सुरक्षा परिषदको बैठक यसअघि गत कात्तिक ५ गते बसेको थियो।