बालबालिका बढी जोखिममा: पठनपाठनको वैकल्पिक व्यवस्था गर्न मानवअधिकार आयोगको आग्रह

काठमाडौं , बैशाख ५ । नेपालमा पछिल्लो समय कोरोना संक्रमणको दर ह्वात्तै बढेको छ । छिमेकि देश भारतमा कोरोना संक्रमणले विभिन्न राज्यमा लकडाउन भइरहेको अवस्थामा नेपालमा पनि कोरोना संक्रमितको संख्या बढेको हो ।

खासगरी भारतसँग सीमा जोडिएको जिल्लाहरुमा कोरोना संक्रमण दर उच्च रहेको छ । यसरी नेपालमा पनि कोरोनाको जोखिम बढेकाले सरकारले उच्च जोखिममा रहेका १४ जिल्लामा शिक्षण संस्थालगायत बढी भिडभाड हुने क्षेत्र तत्काल बन्द गर्न सुझाव दिएको छ । यता राष्ट्रिय मानवअधिकार आयोगले कोभिड–१९ बाट बालबालिका बढी जोखिममा रहेको भन्दै ध्यानाकर्षण भएको जनाएको छ ।

आयोगले आज एक विज्ञप्ति जारी गरी बालबालिकाको स्वास्थ्यको अधिकारप्रति सचेत रहँदै पठनपाठनको वैकल्पिक व्यवस्था गर्न आग्रह गरेको छ ।सरकारले उच्च जोखिममा रहेका जिल्लामा शिक्षण संस्थालगायत बढी भिडभाड हुने क्षेत्र तत्काल बन्द गर्न सुझाव दिए पनि शिक्षण संस्था सञ्चालनमै रहेकाले बालबालिकाहरूको स्वास्थ्यको अधिकार जोखिममा परेको आयोगको निष्कर्ष छ ।

आयोगले उपत्यकाका विभिन्न विद्यायलमा अनुगमन गर्दा निजी विद्यालयको तुलनामा सरकारी विद्यालयमा स्वास्थ्यसम्बन्धी मापदण्ड पालना नभएको पाइएको विज्ञप्तिमा उल्लेख छ ।
विद्यार्थी संख्या धेरै भएकाले ती विद्यालयहरुले टाउको दुःखेका बिरामी विद्यार्थीलाई समेत अन्य विद्यार्थीसँगै एउटै कक्षाकोठामै राखेको पाइएको आयोगले जनाएको छ ।

विद्यालय सञ्चालन गर्ने÷गराउने विषयमा स्वास्थ्य तथा जनसंख्या मन्त्रालय र शिक्षा मन्त्रालयबाटै विरोधाभाषपूर्ण सूचना सम्प्रेषण भएको भन्दै आयोगले स्वास्थ्य मन्त्रालयको राय, सल्लाह र सूचनाबमोजिम व्यवहार गर्न÷गराउनसम्बन्धित पक्षलाई आग्रह गरेको छ ।